தீராவினைகளை தீர்த்து, அக அழகையும், வெற்றியையும் வாரி வழங்கும் ஶ்ரீ ஜெயசுந்தர விநாயகர் பெருமானின் திருக்கோயிலின் ஸ்தல விருக்‌ஷமாக உள்ளது அரசமரம். வயதை நிர்ணயிக்க இயலாத பிரம்மாண்டமான இந்த அரசமரம், பார்வதி தேவி குளித்து முடித்து உலர்த்தும் முடியைப்போல பரந்து விரிந்த ஒரு தோற்றத்தை இப்போதும் உணரலாம். அந்த தேவியின் மடியில் துயில் கொள்ளும் பாலகனாக ஶ்ரீ ஜெயசுந்தர விநாயகர் அம்மரத்தின் அடியில் வீற்றுள்ளார். 

இக்கோவிலின் அழகையும், மெருகையும் கூட்டும் மற்றொரு சிறப்பு அம்சம், இதனை அடுத்துள்ள அக்னி குளம். இந்த பகுதி மக்கள் அக்னி குளத்தை புனிதமாக நினைத்து இதில் குளிப்பதை தவிர்த்துள்ளனர். மேலும் இந்த குளத்தின் நீரை குடிநீராக பயன்படுத்தி வந்துள்ளனர். முற்காலத்தில், பல மன சஞ்சலங்களில் இருந்து தெளிவு பிறக்க மருந்தாக இத்தீர்த்தம் இருந்து இருக்கிறது. விவசாய கிராமமாகவும், விவசாயத்தை சார்ந்த வியாபார கிராமமாகவும் திகழ்ந்த ஊரின் முழு முதல் கடவுள், செல்ல பிள்ளையார். ஊரில் பிறந்த குழந்தைகளுக்கு அறிவு பசி தீர்க்கும் முதல் அக்ஷரம் தொடங்கி, எல்லா நல்ல காரியங்களுக்கும் முதல் பிரார்த்தனை ஶ்ரீ ஜெயசுந்தர விநாயகருக்கு உரியது. 

ஶ்ரீமத் யோகானந்த அம்மையார் அவர்களை ஈர்த்து, அறப்பணிகளில் ஈடுபத்தி, அடுத்துள்ள எல்லா கிராமங்களுக்கும் ஆன்மீக பசி தீர்த்து பின் ஜீவசமாதி ஆன தலமும் இது. சுற்றுவட்ட மாவட்டங்களில், அகத்தில் உள்ள பிரம்மத்தை எளிதில் உணர உண்டான ஜீவ சமாதியும் இதுவே. இதுபோல் இன்னும் கணக்கிலடங்கா பெருமையும், புராதனமும் மிக்க ஶ்ரீ ஜெயசுந்தர விநாயகர் ஆலயத்தை புதுப்பித்து கும்பாபிஷேகம் நடத்த திருப்பணி தொடங்கியுள்ளது.